લોકસભા ચૂંટણીના તમામ તબક્કા પૂર્ણ થયા બાદ એક તરફ દેશ પરિણામોની આતુરતાથી રાહ જોઈ રહ્યો છે તો બીજી તરફ નેશનલ હાઈવે ઓથોરિટી ઓફ ઈન્ડિયા (NHAI)એ જનતાને મોટો ઝટકો આપ્યો છે. NHAIએ દેશભરમાં ટોલ ટેક્સમાં વધારો કર્યો છે.
આજથી જ તમામ ટોલ પ્લાઝા પર ડ્રાઈવરોએ 5 ટકા વધુ ટોલ ટેક્સ ભરવો પડશે. માહિતી અનુસાર, હાઇવે યુઝર ફી વાર્ષિક સુધારણા હેઠળ અગાઉ (1 એપ્રિલ) લાગુ થવાની હતી, પરંતુ લોકસભાની ચૂંટણીને કારણે આ વધારો મોકૂફ રાખવામાં આવ્યો હતો.
માહિતી અનુસાર નેશનલ હાઈવે ઓથોરિટી ઓફ ઈન્ડિયા (NHAI) ના એક અધિકારીએ જણાવ્યું કે ટોલ દરોમાં 3 થી 5 ટકાનો વધારો સોમવાર, 3 જૂન, 2024 થી અમલમાં આવ્યો છે. અધિકારીએ જણાવ્યું હતું કે યુઝર ફી (ટોલ) દરોમાં સુધારો ચૂંટણી દરમિયાન મોકૂફ રાખવામાં આવ્યો હતો, પરંતુ હવે ચૂંટણી પ્રક્રિયા પૂરી થઈ ગઈ છે, આ દરો 3 જૂનથી લાગુ કરવામાં આવ્યા છે.
ટોલ ટેક્સથી સરકાર કેટલું કમાવે છે?
તમને જણાવી દઈએ કે વર્ષ 2018-19માં કુલ ટોલ કલેક્શન 252 અબજ રૂપિયા હતું. આ પછી, વર્ષ 2022-23માં તે વધીને 540 અબજ રૂપિયા થઈ ગયું છે.
શું છે ટોલ ટેક્સ?
તમને જણાવી દઈએ કે ટોલ ટેક્સ એક એવી ફી છે જે કેટલાક આંતરરાજ્ય એક્સપ્રેસવે, રાષ્ટ્રીય અને રાજ્ય ધોરીમાર્ગો ક્રોસ કરતી વખતે ડ્રાઇવરોએ ચૂકવવી પડે છે. આ નેશનલ હાઈવે ઓથોરિટી ઓફ ઈન્ડિયા (NHAI) હેઠળ આવે છે. જો કે, ટુ-વ્હીલર ચાલકોને ટોલ ફી ભરવામાંથી મુક્તિ આપવામાં આવી છે. વિરોધ પક્ષો અને ઘણા વાહનચાલકો ટોલના દરમાં વાર્ષિક વધારાનો વિરોધ કરી રહ્યા છે અને કહે છે કે તેનાથી આવશ્યક ચીજવસ્તુઓના પરિવહનના ખર્ચમાં વધારો થાય છે અને મુસાફરો પર બોજ પડે છે.