મ્યુનિસિપલ કોર્પોરેશન સંચાલિત સુમન હાઈસ્કૂલ હવે શહેરની ખાનગી શાળાઓને સ્પર્ધા આપી રહી છે. બોર્ડની પરીક્ષાના પરિણામોમાં સુમન હાઈસ્કૂલનું શ્રેષ્ઠ પરિણામ આવ્યું છે. આ કારણોસર લોકોનો હવે ખાનગી શાળાઓથી મોહભંગ થતો જાય છે અને સુમન હાઈસ્કૂલ તરફ તેમનો ઝોક વધી રહ્યો છે. આ વર્ષે પણ હજારો વિદ્યાર્થીઓ સુમન હાઈસ્કૂલમાં ધોરણ 9માં પ્રવેશ મેળવવા રાહ જોઈ રહ્યા છે.
મહાનગરપાલિકા છ ભાષામાં 23 સુમન હાઈસ્કૂલ ચલાવી રહી છે:
સુરત મહાનગરપાલિકા છેલ્લા કેટલાક વર્ષોથી પ્રાથમિક શિક્ષણની સાથે હાઈસ્કૂલ સુધીના શિક્ષણની જવાબદારી પણ નિભાવી રહી છે. મ્યુનિસિપલ કોર્પોરેશને શહેરમાં ગુજરાતી, મરાઠી, હિન્દી, અંગ્રેજી, ઉર્દૂ અને ઉડિયા સહિત છ ભાષાઓમાં 23 સુમન હાઈસ્કૂલ શરૂ કરી છે. જ્યાં ધોરણ 9 થી 12 સુધીનું શિક્ષણ આપવામાં આવે છે. આ શાળાઓમાં ગર્લ સ્ટુડન્ટ્સને ફ્રી એડમિશન આપવામાં આવે છે, જ્યારે છોકરાઓ પાસેથી વાર્ષિક માત્ર 200 રૂપિયા લેવામાં આવે છે. સુમન હાઈસ્કૂલોમાં નજીવી ફી તેમજ વધુ સારું શિક્ષણ આપવામાં આવતું હોવાને કારણે વિદ્યાર્થીઓ અને વાલીઓનો ઝોક સુમન હાઈસ્કૂલ તરફ વધી રહ્યો છે. આ વખતે પણ તમામ સુમન હાઈસ્કૂલના 98 વર્ગોની ક્ષમતા મુજબ 5500 વિદ્યાર્થીઓને પ્રવેશ આપવામાં આવ્યો છે અને 5800થી વધુ વિદ્યાર્થીઓ વેઈટિંગ લિસ્ટમાં છે.
વિશેષ મંજુરી હેઠળ બે શાળાઓમાં વર્ગોની સંખ્યામાં વધારોઃ
સુમન હાઈસ્કૂલોમાં પ્રવેશ મેળવતા વિદ્યાર્થીઓની સંખ્યામાં સતત વધારો થઈ રહ્યો છે. આ વખતે પણ 23 માંથી 22 એવી શાળાઓ છે જ્યાં પ્રતિક્ષા યાદી 100 ટકા છે. એટલું જ નહીં વિદ્યાર્થીઓની સંખ્યા જોઈને મહાનગરપાલિકાએ લિંબાયત નીલગીરી સર્કલ પાસે આવેલી સુમન હાઈસ્કૂલ નંબર 5 અને ઉધના વિજયા ખાતે આવેલી સુમન હાઈસ્કૂલ નંબર 6માં 9મા ધોરણના વર્ગોની સંખ્યા 5 થી વધારીને 10-10 કરી છે.
